正所謂「初歸新抱，落地孩兒」，拍過《我的野蠻奶奶》嘅胡杏兒，好明白婆媳糾紛嘅可怕。好彩，現實中嘅佢同奶奶相處融洽，應該唔會家嘈屋閉。 胡杏兒15年出嫁嗰時，喺「李家祠堂」話要一年抱三。最後梗係做唔到啦，但結婚年半已經一索得男，總算對得住鄉親父老，對得住老爺奶奶！所以，奶奶好錫呢個肚仔爭氣嘅新抱仔，一家人放假遊西貢，奶奶暫且充當工人姐姐，傍實幫手。奶奶唔只一到埗就負責推BB車，等杏兒兩公婆可以傾吓偈親近吓，當BB需要食奶奶時，奶奶更會眼到手到，兩婆媳夾手夾腳準備BB用具，然後一齊匿入車廂餵奶。 有個幫得手嘅好奶奶，杏兒亦好識Do，趁老公幫手湊仔，兩婆媳就好似姊妹咁，一齊入舖頭濕平。講到買嘢，始終都係女人同女人先啱嘴形，就算只係買健康食品。直到臨走嗰時，杏兒更主動做機婆，揸機幫老公、奶奶、B仔影返張三代同堂，然後好冧好嗲咁繞住奶奶手離開。 有個咁嘅新抱，奶奶都好難惡得出樣啦，何況出名事業心重嘅杏兒，未生前講到明坐完月就復工，點知生完後心態180度轉變，話有衝動生多個。新抱仔咁「識諗」，奶奶更加錫到佢燶。 相關新聞: 千萬酬勞拍劇照推 胡杏兒:我一定要追多個 http://bit.ly/2raV9mD 胡杏兒成為熟手媽媽 換片餵奶自己一手包辦 http://bit.ly/2mDRF6m 愛不惜手 杏兒老公錫B錫到濃 http://bit.ly/2DgY7LI 【生完唔願做】 葉翠翠唔夠半年再追第二胎 謝安琪繼續做小女人 http://bit.ly/2B5BnZr