相關連結: 【直擊放蛇●日本走私黃金】山口組招攬港青 偷運黃金往日本 http://bit.ly/2qRCzeg 【直擊放蛇●日本走私黃金】90後男女偷運黃金 日本落網實錄 http://bit.ly/2qR6yCT 【直擊放蛇●日本走私黃金】偷運黃金90後港男女 逐個起底 http://bit.ly/2plv9P5 【直擊放蛇●日本走私黃金】揭運金集團面紗 貼身跟蹤山口組成員 http://bit.ly/2ppNhIk 這個走私黃金團，其實是在2015年時在facebook以「日本水貨團」作招徠。該facebook專頁，主持人以日本名「小川」作為網名，引誘網民加入，表明除免費來回日本的國泰機票及住宿外，還有二千元報酬。 記者放蛇查詢，接電話的男士自稱叫阿勤，他坦承，是負責網上招人運黃金到日本，「大把人想做，唔係想做就有得做，你個樣要企理先得，我要見過你之後，再詳細講啦！」之後他相約記者到旺角面試。 身材瘦削的阿勤，和同樣廿多歲的拍檔Hugo出來見面，和記者同場面試的，還有另外一對年約廿歲頭的情侶。Hugo一開口便向記者大派定心丸，「唔使驚，運黃金入日本，同走水貨一樣，捉到都係罰錢唔使坐監。」 之後他滔滔不絕地說：「我哋係一門生意，提供埋住宿機票，而且實際工時都好短啫，坐幾個鐘頭飛機啫，過咗關之後，全部係你私人時間，三日兩夜你自己玩晒，嘩！免費遊日本喎 」一同面試的情侶頻頻點頭，顯得非常雀躍。 Hugo直言，每人須身帶四條金條，每條約重一公斤，加起來不會很重。「放心，唔係好重嘅，你綁喺條腰度，當多個肚腩冇咩感覺嘅，唔會俾你哋帶上機，你落機後先俾你哋綁上身，都係最多半個鐘排隊。」 他更說自己是代表日本山口組，「呢個生意其實係我哋同日本山口組做嘅，啲錢同金都係屬於山口組，當中賺個差價，你知日本消費稅要成8%，話俾你知都唔驚，因為你哋做唔到，因為日本國內金價比外面（國際）貴啲，只要有本事運到黃金入去，肯定有賺無蝕 」 Hugo更提議各人穿上鬆身衫，如大一個碼的T恤或外套，皮帶扣緊就可以瞞天過海。他更派定心丸，說假如不幸被海關截獲，「也不用坐監」，只要詐傻扮懵表示，不想帶太多現金在身，想帶黃金去日本找尋投資機會便可。 「你話唔知帶咁多黃金入境係犯法，日本嗰邊最多都係扣留批黃金，唔會捉你坐監，但你千萬唔好承認係幫山口組做嘢，否則就麻煩好多，總之乜都話唔知，猛講對唔住就會放你走。」 Hugo落足咀頭氹人參與走私，若果為那一丁點少便宜，隨時會惹上一身蟻。 撰文：艾馬、劉歡、文浪 攝影：林川、金文、田俊、王晴 壹週Plus : http://hk.next.nextmedia.com 即 like 壹週Plus fb : http://www.facebook.com/nextmagazinefansclub